Nco Txog Yawg Hlob Colonel Yaj Txos
Sawv ntxov tsees hauv lub 1 hlis ntuj hnub tim 19, 2012, 1 tug txiv nees thauj yawg hlob Colonel Yaj Txos lub cev, taug 3 tsem kev los mus rau ntawm lub tuam tsev Legacy Funeral Home hauv nroog St. Paul, xeev Minnesota. Cov tsev neeg nrog rau cov qub tub rog, thiab cov kwv tij neej tsa nrog rau Hmoob cov coj noj coj ua tseem tau tuaj txhij zog, saib nws rau qhov siab, lawv nws qab, ua ib kab sab, hawm nws ib zaug ntxiv. Ho hais txog kev sib koom tes ua yawg hlob Colonel Yaj Txos lub ntees zaum no, yog muaj nws tsev neeg nrog rau cov tsev teev ntuj, ib cuab kwv tij Hmoob Yaj, cov qub nom qub tswv, thiab cov coj noj coj ua nyob rau hauv Hmoob zej Hmoob zos. Txoj kev koom tes zaum no tau muaj tshwm sim vim hais tias yawg hlob Colonel Yaj Txos tau muaj txiaj ntsim ntau heev rau peb Hmoob, tsis hais tias yuav yog tam sim no los sis nyob rau yav ntuj qub qab.
Yawg hlob Colonel Yaj Txos yog yug nyob rau hauv lub zos Hav Cuaj Yig, xeev Khuam teb, hauv hnub tim 19 lub 7 hli ntuj, xyoo 1935. Keeb kwm ntawm yawg hlob Colonel Yaj Txos, nws kuj yog Hmoob ib tug qub nom qub tswv. Thaum ub nws yog ib tug tuam thawj tub ceev xwm saib tag nrho cov tub ceev xwm nyob rau lub nroog Looj Ceeb, Los Tsuas teb. Nws tau mus kawm tiav sab kev ua ib tug tub ceev xwm nyob rau Thaib teb hauv xyoo 1955. Tom qab ntawd, nws kuj tau los ua ib tug tub ceev xwm nyob rau sab qab teb, lub zos Pakse, Los Tsuas teb. Dhau li, nws kuj tau los mus lis dej num nyob rau lub zos Vientiane. Hauv xyoo 1959, yawg hlob Phas Nyas Tub Npis Lis Foom thiaj li tau thov Tseem Fwm Los Tsuas kom lawv tso cai cia yawg hlob Colonel Yaj Txos los mus li dej num nyob rau Looj ceeb. Hauv xyoo 1974, yawg hlob Yaj Txos thiaj tau nws lub xaab Kos Los Nees (Colonel). Hauv xyoo 1975, yawg hlob Colonel Yaj Txos tau tsiv teb tsaws chaw, ua ib tug neeg thoj nam nrog nws tsev neeg, tuaj mus nyob rau Thaib teb. Nws thiaj tau tuaj mus rau Fab Kis teb hauv xyoo 1977, thiab nyob tau 19 lub xyoos. Hauv 1996, nws thiaj tau txiav txiv siab coj nws tsev neeg los mus nyob rau Amelikas teb, thiab thiaj li los nyob txog niaj hnub tam sim no.
Ntawm peb haiv Hmoob nyob rau Minnesota, yawg hlob Colonel Yaj Txos lub ntees zaum no kuj yog ib lub ntees loj tshaj plaws lawm. 18 xeem Hmoob nyob rau hauv lub xeev Minnesota no yeej tau muaj feem cuam thiab tau tuaj mus ua xyom cuab txhua nhro. Hmoob cov coj noj coj ua kuj tau tuaj hawm thiab tuaj xyuas yawg hlob Colonel Yaj Txos txhij zog. Niam Nais Phoo Ntxhoo nrog rau cov qub nom qub tswv neeg los tsuas los kuj tau tuaj tshwm ntsej tshwm muag ua ib txog kev hawm txog yawg hlob Colonel Yaj Txos ua zaum kawg, thiab qhia rau nws tsev neeg paub hais tias lawv pab nrog nws tsev neeg tu siab heev. Lub ntees no kam ua tau 5 hnub diam, es cov txheej txeem thiaj li tiav tag raws li qhov tau teev cia. Hauv hnub kawg, 2 lub tsheb npav tau tuaj tos yawg hlob Colonel Yaj Txos lub cev thiab nws tsev neeg nrog rau coob leej ntau tus cov kwv tij neej tsa thiab cov nom cov tswv. Lawv thiaj tau coj nws mus zais nyob rau hauv lub zos Wales, uas yog nyob rau ntawm lub nroog Milwaukee ib sab, xeev Wisconsin.
Hmoob cov qub nom qub tswv tsuas muaj dua zuj zus lawm xwb. Rau yawg hlob Colonel Yaj Txos, nws tau tas ib sim neej nyob rau hauv lub 12 hlis ntuj hnub tim 11, 2011. Kev tas sim neej zaum no yog yeeb vim nws tus mob tsis tso nws tseg. Nws tau tso tseg rau tom qab yog 1 tug poj niam, 20 tus me nyuam, thiab 52 tug xeeb ntxwv.
Hmong Pages thov nrog nej cov me nyuam tu siab hais tias nej txiv, uas yog ib tug muaj koob muaj npe, tau tso nej tseg lawm. Thov kom nej sib sib hlub mog.
Tus sau: Chalee Yang
