Peb Caug Xyoo Caub Fab
Hauv lub 1 hlis ntuj hnub tim 14, 2012, tsev neeg Hmoob Yaj, uas yog United Yang Family Organization, tau ua ib lub koob tsheej, ua plig, loj tsim nyog, nyob rau hauv lub tuam tsev Koos Haum Tsev Neeg Los Tsuas, nroog Xees Phos, Xeev Minixautas, tos txais yawg hlob Xaiv Phiab thiab nws tsev neeg. Rooj mov no txhais tau hais tias kom sawv daws txhob rawm tag kev cia siab, yog hais tias toj pes quas xwb ces yeej yuav sib ntsib dua ib hnub xwb thiaj tag.
Hauv lub 2 hlis hnub tim 14, xyoo 2011, yawg hlob Xaiv Phiab nrog rau nws tsev neeg thiaj phoom phoom tuaj tshwm nyob rau Amelikas teb. Txawm hais tias yuav ua neeg thoj nam hauv xyoo 1975 los sis hauv xyoo 2006, nws yeej tsis sib txawv hlo li. Ua neeg thoj nam nyob rau Thaib teb, yawg hlob Xaiv Phiab lawv yeej nyob tau txom nyem ntsawb ntsuav, tsis muaj noj muaj haus, tsis tau noj tau hnav, thiab tseem ntshai rwg tsam luag lam lim hiam rau yus.
Ho hais txog lub neej ntuj qub qab nyob rau Los Tsuas teb, yawg hlob Xaiv Phiab kuj yog txiv Nais Phoo Vaj Pov ib tug qub nom, ib tug Kav piv tees, nyob rau sab Moos Mauj. Thaum sawv daws nrog rau yawg hlob Nias Phoo Vaj Pov khiav tawm tag lawm, yawg hlob Xaiv Phiab thiaj tau txiav txim siab nyob, tsis khiav, vim yog nws muaj pej xeem huab hwm ntau heev. Ua ib siab, pib ib lub neej tshiab nrog rau Tseem Fwm Nplog Liab. Thaum luag tuaj txog lawm, luag kuj hais zoo zoo xwb, tiam sis luag tag zog siv lo lus hais tias, “Nej cov nyob rau sab xis no tseem muaj kev kawm tsis tau txaus. Yog li no, nej yuav tau raug coj mus kawm ntxiv.” Thaum yawg hlob Xaiv Phiab tau hnov cov lus no lawm. Nws thiaj tau sawv thiab thiaj tau ciaj ua ib thawj Caub Fab uas nyob ntej tsaj plaws rau hauv lub teb chaw Los Tsuas.
Nrog nqe lus no, hauv lub 1 hlis, xyoo 1976, yawg hlob Xaiv Phiab thiaj tau khiav nkag hav zoov hav tsuag, rov qab kwv riam kwv phom, sawv ua pab ua pawg, nrog Tseem Fwv Nplog Liab sib tua. Lub Neej Caub Fab thiaj tau pib chiv muaj los lawm tau 30 lub xyoo no. Tseem Fwv Nplog Liab, luag muaj dav hlau, tsheb hlau, phom loj, phom me nrog ncig ris tsho thiab khau tawv. Txawm li no los, yawg hlob Xaiv Phiab yeej tseem nyob tus yees vim hais tias sab teb chaws no yog nws sab, tsawg lub roob tsawg lub hav los nws yeej paub txhij zog. Hnov dheev suab dav hlau ya tuaj mus, yuav tsaws rau ib lub roob twg. Yawg hlob Xaiv Phiab lawv yeej raws tuaj mus kom ncav, tua dav hlau, tsis pub kom tsaws tau hlo li. Tseem Fwv Nplog Liab cov tub rog nyob rau saum cov ncov roob, yawg hlob Xaiv Phiab lawv nyob rau hauv cov hav. Thaum Tseem Fwv Nplog Liab cov tub rog nqis los mus nqa dej haus, thaum ntawd, lawv mam li tua xwb. Yawg hlob Xaiv Phiab lawv yeej nyob tsis muaj chaw hlo li, ib ob lim piam ib roob, ib ob lim piam ib hav. Lawv cov pa taws ncho txog qhov twg, Tseem Fwv Nplog Liab tuaj pov foob pob txog rau qhov ntawd. Yog vim kev ntshaw kom muaj ib thooj av, yawg hlob Xaiv Phiab thiaj tsis kam leej lub npe Caub Fab, thiab thiaj tau hu lawm pab Moos Mauj no hu ua, “Cov qub tub rog uas seem ntawm nplua tsov rog CIA.” Peb Hmoob cov uas tseem nyob rau Los Tsuas Teb, tsis hais tias yuav yog cov qub tub rog los sis tej pej xeem huab fwm, thiab tau txiav txim siab sawv los mus kwv riam kwv phom tiv thaiv lawv ciam dej ciam av thiab lawv cov tsev neeg los yog yeeb vim lawv ntseeg siab hais tias Tseem Fwv Nplog Liab no yeej tsis muaj kev ncaj nces hlo li, es lawv thiaj li tau raug kev txom nyem ntau tag npaum li no.
Tig los mus hais txog ntawm yawg hlob Xaiv Phiab pab neeg nyob rau sab Moos Maum no. Thaum lawm xub pib khiav nkag hav zoov hav tsuag, lawm yog muaj 6,000 leej nrog rau 674 tug tus rog. Tsis hais los yeej paub lawm hais tias lawv txoj kev nyob thiab txoj kev nrhiav noj haus yog zoo li cas. Vim riam phom los muaj tsis txhij, ris tsho thiab khau los tsis muaj rau, zaub mov los tsis muaj noj, yawg hlob Xaiv Phiab thiaj tau hais tias, “Tej me nyuam yeej tsis paub hais tias mov zoo li cas lawm.” Tsis muaj ib daig teb los sis ib tug tsiaj, ncaj tsawb, ntov txiv tsawb noj, pom toov laj, tho plawv toov laj noj, ntsib kav theej, tho plawv kav theej noj, pom qos, khawb qos noj, qhov no, tsuas yog cawm kom txoj sia tsis txhob tu xwb. Tsis muaj ib vaj ib lub tsev los mus nkaum tshav nkaum nag, ib leeg ib daim ntaub, ib leeg ib rab riam, ib hnub pw ib lub roob, thiab ib hmos pw ib lub hav. Txom nyem npaum li no es, hauv xyoo 2006 no yawg hlob Xaiv Phiab thiab nws pab neeg no thiaj tau nyiag kev khiav los mus tshwm nyob rau Thaib teb. 30 lub xyoo tom qab nplua tsov rog Cuab Fab no, yawg hlob Xaiv Phiab tsuas tshuav 1,400 tawm leej lawm xwb. Kwv tij Hmoob, hais los mas ntxim tu siab kawg nkaus.
Nrog kev pab ntawm cov kwv tij nyob rau Amelikas teb, cov nom tswv Thaib, thiab United Nation (UN), feem ntau yawg hlob Xaiv Phiab cov neeg kuj tau tuaj mus rau cov teb chaw thib 3 tag lawm. Muaj 37 yim nrog rau yawg hlob Xaiv Phiab, lawv kuj tau tuaj rau Amelikas teb lawm, 28 tsev neeg kuj tau mus rau Australia lawm, 3 tse neeg kuj tau mus rau Canada lawm, 2 tse neeg, uas yog yawg hlob Xaiv Phiab 2 tug tub, kuj tau mus rau Netherland lawm, thiab tab sis, tseem tshuav 25 yig neeg, uas muaj 138 leej tseem nyob rau Thaib teb, tsis tau kev tawm hlo li. Tsis tag li no, hauv nplua tsov rog Caub Fab zaum no, yawg hlob Xaiv Phiab kam tuag lawm 5 tug me nyuam, thiab nws tsev neeg kam raug faib mus nyob lawm 5 lub teb chaws, Amelikas teb, Thaib teb, Phillipine, Netherland, thiab Los Tsuas Teb.
Yog vim li no, lub koob tsheej nyob rau hauv lub 1 hlis ntuj hnub tim 14, 2012 no, Hmoob cov qub nom qub tswv, cov coj noj coj ua, cov qub tub rog, thiab cov kwv tij neej tsa thiaj tau tuaj txhij zog ua ib txog kev sov siab thiab qhib ib txog hau kev tshiab rau yawg hlob Xaiv Phiab Yaj thiab nws tsev neeg tau taug mus lawm yam tom ntej.
Tus sau: Chalee Yang
