Nais Phoo Vaj Pov Ncaim Hmoob Mus Tau Ib Xyoo Nkaus
Hmoob tus vaj, yawg hlob Phagna Norapamok Nais Phoo Vaj Pov tau tso peb Hmoob tseg tau ib lub xyoos txwm nkaus, nyob rau hauv lub 1 hlis ntuj hnub tim 6, 2012 no.
Ib xyoos dhau los lawm, yuav hais tias luv los kuj tsis luv, ho yuav hais tias ntev, los kuj tsis tau ntev heev thiab. Zoo li nag hmo xwb, Hmoob California tseem sam sim noj Peb Caug, yawg hlob Nais Phoo Vaj Pov cia li mob nyhav heev nyob rau hauv lub tsev khos mob, nroog Clovis, xeev California. Tsaib no, hauv lub 1 hlis ntuj hnub tim 6, 2011, nws thiaj tau tso peb Hmoob tseg lawm. Hmoob cov coj noj coj ua thiaj tau tuaj mus sib koom nyob rau hauv Fresno, thiab thiaj tau loj npab hlo, lis dej lis num tiav log, tos txais yawg hlob Nais Phoo Vaj Pov lub cev, coj rov qab los rau hauv vaj hauv tsev thiab muab coj los ua dab ua qhua. Pej xeem huab hwm Hmoob thoob ntiaj teb tseem tos tau ib lub hlis nkaus, thiaj txog caij txog nyoog. Hauv lub 2 hlis ntuj hnub tim 4, 2011, ntuj ntsuab xiab, hnub ci ntsa iab, thaum 11 teev sawv ntxov, 2 tug txiv nees daub, tshwm zuj zus, thauj Hmoob tus Vaj, yawg hlob Nais Phoo Vaj Pov, los mus hla txhiab txhiab phav phav tus Hmoob, los mus nkag rau hauv Fresno lub Convention Center. Nyob Rau hauv hnub sam sab uas yog lub 2 hlis ntuj hnub tim 9, 2011, 13 lub tsheb npav tuaj nres tos yawg hlob Nais Phoo Vaj Pov tsev neeg, ntxiv rau cov muaj meej mom, thiab cov pej xeem huab hwm. Sawv Kev coj yawg hlob Nais Phoo Vaj Pov lub cev coj mus zais cia rau ntawm lub toj ntxas Forest Lawn Cemetery nyob rau lub zos Glendale, xeev California.
Hmoob lub siab dai ncuv, tseem hlub hlub tshua tshua, xav rov qab pom xav rov qab ntsib Hmoob tus vaj, yawg hlob Nais Phoo Vaj Pov, ib zaug dua, saib lub siab puas yuav nqig, qhov mob mob ntawd saib puas ploj mus. Suav ntsoov yog 107 hnub, thiaj li txog rau hnub coj yawg hlob Nais Phoo Vaj Pov tus ntsuj tus plig rov qab los xyuas vaj xyuas tsev, thiab xyuas nws ib tsoom Hmoob, ib zaug dua, ua zaum kawg. Kev tso plig zaum no, yog yawg hlob Xaiv Nus Vaj, Tus Tuam Thawj Tswj Fwm rau Lub SGU of Minnesota Veteran and Family of USA Inc. thiab yog ib tug lawm kwv ntawm yawg hlob Nais Phoo Vaj Pov, ua ib tug ntaus thawj, thiab thiaj coj los tso plig nyob rau hauv lub nroog St. Paul, xeev Minnesota, hauv hnub tim 27 lub 5 hlis ntuj, 2011 no. Kev Tso plig zaum no kam siv 3 hnub diam, es dab qhuas thiaj ntxhee log. Zoo xws li, cov laus neeg Hmoob lub dag lub zog, uas khaub zig nrog rau txoj kev cia siab, ploj ntshawv ntshis ntawm qhov muag lawm, ncav los zoo li cav tsis cuag, pib tsaus ntuj zem zuag, tib yam li raug niam txiv tso ua ntsuag, cia nyob ib leeg nti kaub puab rau pem toj siab, plawv hav zoov nuj txeeg dub nciab.
Hmoob tsev nthuag, Hmoob tau kev quaj ntsuag los tau ib lub xyoos no lawm. Li yawg hlob Xaiv Nus Vaj hais, “Ntsai yuav tsis muaj leej twg los ntoo tau Nais Phoo Vaj Pov lub kaus mom ntxiv li lawm.” FHais txog ib feem, uas yog cov pem xeem huab hwm Hmoob, nyias kuj nyob nyias ntsiag twb to, tiam sis tshuav ib feem, cov paub tab kuj nyuab siab ntxhov plawv, pw los tsis tsaug zog, noj haus los tsis poob plab, tsis paub hais tias Hmoob lub neej tom ntej no yuav mus zoo li cas lawm. Tau ib lub xyoos no xwb, hauv Hmoob zej Hmoob zos, cov tig nraub qaum mus lawm ncaj nraim los kuj pib tig mus tag lawm thiab, cov ho tig xub ntiag los mus sib puag xwb pwg los kuj tig los lawm ntau lawm thiab, rov qab los noj sib hlub haus sib ce zoo xws li thaum ub, uas tej niam tej txiv tau ua muaj tseg nyob rau hauv Hmoob lub neej qub qab, los kuj muaj coob leej ntau tus lawm thiab. Cov ho txhob txwm siv lub sib hawm no coj los qhib tej qhov rooj soj xyuas saib txoj hau kev twg thiaj yuav yog txoj zoo taug yooj yim, qhov no los yeej muaj lawm thiab. Luag taug kev, luag yeej tsis zam hlo li, hais los mas, kuj ntxim tu siab kawg kiag li thiab.
Hauv ib lub xyoos no, peb Hmoob Minnesota kuj noj dhau los lawm ib July 4 and ob lub Tsiab Peb Caug, Koos Haum Tsev Neeg Los Tsuas kuj xaiv tsa tau ib pab Board of Directors los sis Cov Thawj Tswj Fwm tshiab lawm, thiab 18 xeem los kuj xaiv tau thiab tsa muaj cov thawj tswj fwm tshiab tag lawm tib si thiab. Thxawm li cas los, yawg hlob Xaiv Nus Vaj xav kom tej hluas hais lus thiab coj tus cwj pwm, kom saib taus cov laus, cov ua niam ua txiv, thiab cov coj noj coj ua, tsis txhob lam tsuj lam liam hais tias tej laus, thaum ub, cij qos cuav rau tej hluas zov, vim hais tias tej laus yeej tau muab roj ntsha los puas lub teb chaws, es sawv daws thiaj dim tuaj mus rau hav ntaub hav ntawv. Yog li no, tsis tsim nyog lawm hais tias yawg hlob Nais Phoo Vaj Pov nyuam qhuav tuag tag nrho xwb, tsis tau pig tsawg hnub pig tsawg hmo, tej lus seev txog Hmoob no txawm siv nrov thoob plaws txog tag rau txua leej txhua tus. Hais txog ntawm yawg hlob Nais Phoo Vaj Pov tsev neeg, Vam Txoov Vaj, uas yog yawg hlob Nais Phoo Vaj Pov ib tug tub hlob, tau raug xaiv tsa los mus sawv cev nyob rau hauv Lub Xa Pha Huam Lao (Lub Koom Haum Tseem Fwm Sib Sau Neeg Los Tsuas Los Ua Ib Ke). Tsis tas li no xwb, yog yawg hlob Nais Phoo Vaj Pov tus tub Neej Tswb Vaj, tseem tau raug xaiv tsa los mus ua tus sawv cev thiab tswj fwm nyob rau hauv yawg hlob Nais Phoo Vaj Pov tsev neeg.
Dua li, hauv lub 1 hlis hnub tim 6, 2012 no, Lub SGU of Minnesota Veteran and Family of USA Inc. (Koos Haum Qub Tub Rog SGU nyob rau Minnesota) yuav muaj ib lub koob tsheej ua kev nco txog yawg hlob Nais Phoo Vaj Pov nyob rau tim Tsev Dawb (Capital) hauv nroog St. Paul, xeev Minnesota thaum 10 teev sawv ntxov. Lub hom phiaj ntawm lub koob tsheej no yog yuav los mus nco txog yawg hlob Nais Phoo Vaj Pov hais tias nws tau ncaim peb Hmoob mus lawm tau ib lub xyoo tseem nkaus. Tom qab cov kab lim kev cai tim tsev dawb tiav tag lawm, hais raws li yawg hlob Xaiv Nus Vaj, Tus Tuam Thawj Tswj Fwm rau Lub SGU of Minnesota Veteran and Family of USA Inc. tus ntsu lus, lawv yuav los sib sau nyob rau ntawm koos haum Tsev Neeg Los Tsuas kom txog ntua rau thaum 12 teev ib tag hmo. Yog li no, yawg hlob Xaiv Nus Vaj xav thov nqua hu peb Hmoob txhua leej txhua tus tuaj mus koom lub koob tsheej nco txog yawg hlob Nais Phoo Vaj Pov zaum no.
Xaus no, yawg hlob Xaiv Nus Vaj xav tseg ib lo lus rau peb Hmoob, yog hais li no, “Peb tsis muaj niam muaj txiv lawm, peb yuav tau sib hlub, sib puag xwb pwg, kom peb muaj txoj kev sib haum xeeb. Yuav ua ib tug thawj coj, yuav tau xaiv lo lus kom los teev tau luag lub kua muag. Tus ntawd thiaj yuav coj tau peb Hmoob mus lawm yav tom ntej.”
Tus sau: Chalee Yang
