Hmoob Minnesota Noj Peb Caug

Hmoob lub Peb Caug nyob rau Minnesota xyoo 2011 no yog muaj noj nyob rau hauv lub 11 hlis hnub tim 25, 26, thiab 27. Hmoob Minnesota lub Peb Caug hauv xyoo no yog ib lub Peb Caug uas muaj sib hawm tsawg tshaj plaws los mus npaj. Qhov tau sij hawm tsawg heev no, yog yeeb vim kev sib cov nyom nyob rau hauv Lub Koom Haum Lao Family sab kev xaiv tsa Cov Thawj Tswj Fwm (Board of Directors) thaum lub 12 hlis ntuj, tsaib no.

Kev koom tes chiv peev, pab dag pab zog, thiab lis dej lis num nyob rau hauv Hmoob Minnesota Lub Tsiab Peb Caug xyoo no yog muaj tshwm sim los ntawm Lub Koos Haum Lao Family Community of Minnesota, Inc., Lub Koos Haum Minnesota Veterans Inc., thiab Lub Koos Haum Association for the advancement of Hmong Women in Minnesota, Inc. Tom qab lub 10 hli hnub tim 7, 2011, yawg hlob Tswj Pheej Lis lawv Pab Thawj Tswj Fwm thiaj tau los mus tuav Lub Koom Haum Lao Family raws kev lij choj. Lawv 3 lub Koom Haum no thiaj tau los mus xaiv tsa tau Yawg hlob Tsav Yias Lis, uas yog  Lub Koom Haum Minnesota Veterans Tus Lwm Thawj Coj, los mus ua tus Tuam Thawj Coj (Pab Thaa) rau Lub Tsiab Peb Caug no. Txawm lub caij nyoog yuav luv npaum li cas los, yawg hlob Tsav Yias yeej txaus siab los mus tuav teg dej num no. Nws tsuas muaj caij nyoog thaj tsam ib lub hlis xwb los mus npaj rau lub Peb Caug xyoo 2011-12 no.

Yawg hlob Tsav Yias kuj tau hais rau Hmoob Pages hais tias, “Cov program los kuj zoo tsim nyog lawm thiab.” Hmoob thoob qab ntuj khwb no kuj tau tuaj koom Hmoob Minnesota lub Tsiab Peb Caug no txij zaug. Hmoob Suav thiab Hmoob Thaib kuj tau tuaj hu nkauj rau peb Hmoob Amelikas mloog thiab. Tsis tag li no xwb, Phab Ej Hmoob Nuj Nplaib los tseem tuaj seev suab hu nkauj, thiab foom koob hmoov rau niam Nias Phu thiab peb Hmoob sawv daws. Hmoob Australia, Fab Kis Teb, los mus rau Hmoob Los Tsuas teb, los kuj tuaj txhij zog nrog peb noj Peb Caug. Thiab niam Ntxhoo, niam Nais Phu Vaj Pov, kuj tau tuaj qhib lub xyoo tshiab no rau ib tsoom Hmoob pib Noj Peb Caug mus. Nws kuj tau los hais tias, “Kuv tu siab, kuv coj tsis tau txiv Nais Phu tuaj qhib Tsiab Peb Caug rau nej lawm, tiam sis kuv tseeg siab hais tias nws tus plig thiab nws txog kev hlub, nws lub hwj chim, tseem nrog peb nyob nod.” Dua li, nws tseem los foom koob hmoov rau ib tsoom Hmoob hais tias, “Xyoo tshiab ncig los txog lawm, kom peb niam txiv kwv tij neej tsa Hmoob kom mov tshiab los kom tau noj, dej tshiab los kom tau haus, kom yug tub kom los ua nce kub, kom yug ntxhais kom los ua ncej nyiaj, kom peb Hmoob sawv daws tsuas muaj txoj kev sib hlub, sib haum xeeb mus rau xyoob tshiab no.”

Hauv sab kev sib tw nyob rau hauv Hmoob Minnesota Lub Tsiab Peb Caug hauv xyoo 2011-12 no, yog muaj 5 yam hau kev sib tw. Cov kev sib tw zaum no yog muaj kev hais kwv txiaj, Kev hu nkauj, kev seev cev traditional dance, kev seev cev Modern dance, thiab kev xaiv ntxhais nkauj ntsuab. Cov tub ntxhais uas tau tuaj mus sib tw thiab tau thib ib nyob rau hauv xyoo 2011 no yog muaj raws li nram no. Tus seev suab hais kwv txiaj uas tau thib ib no yog Maiv Yias Lauj, tus seev suab hu nkauj uas tau thib ib yog Suab See Thoj, pab seev cev traditional dance uas tau thib ib yog Nkauj Iab Nraug Oo, thiab pab seev cev Modern dance uas tau thib ib yog Bio Freak.

Nyob rau hauv sab kev xaiv ntxhais nkauj ntsuab nyob rau hauv xyoo 2011 txuas mus rau 2012 no. Hmoob Minnesota Lub Tsiab Peb Caug tsab cai yog muaj raws li nram no. Yog tus ntxhais twg tau thib ib, no ces nws yuav tau ua ib tug zoo qauv rau ib tsoom Hmoob. Nws yuav tau coj ib tug yeeb yam kom zoo nyob rau hauv txhua lub sij hawm. Nws yuav pab txawb tej koos haum Hmoob nyob rau hauv nruab zej nruab zos. Nws yuav tau tshawb fwb thiab coj cov ntsiab lus no, coj los mus cev thiab hais tawm qhia rau ib tsoom Hmoob, nws yuav tau los mus pab dag pab zog dawb rau nruab ze nruab zog, yam tsawg kawg nkaus yog 100 xuab moos, nws yuav tau pab rau lub xyoo tshiab 2012 uas yuav los tom ntej no, thiab nws yog yuav tsis tau txiv nyob rau hauv sij hawm thaum nws tseem yog Hmoob Minnesota tus ntxhais nkauj ntsuab.

Nrog cov qe lus no, 3 tug ntxhais uas tau thib 1, thib 2, thiab thib 3, yog muaj rau li nram no. Tus ntxhais nkauj ntsuab Vav nas Yaj yog tus tau thib 3, tus ntxhais nkauj ntsuab Kiab Xyooj yog tus tau thib 2, thiab tus ntxhais nkauj ntsuab Paj Nyiag Hawj yog tus tau thib 1 nyob rau hauv lub xyoo 2011 no. Cov paj tsab rau 3 tug ntxhais nkauj ntsuab zaum no yog tus ntxhais nkauj ntsuab Vav nas Yaj yog tau txais $1,000.00,  tus ntxhais nkauj ntsuab Kiab Xyooj yog tau txais $3,000.00, tus ntxhais nkauj ntsuab Paj Nyiag Hawj yog tau txais $6,000.00. Tiam sis, Minnesota lub Tsiab Peb Caug yuav tsuas muab $5,000.00 rau nws xwb. Yog thaum twg, nws lis nws teg dej num tiav tag lawm, Minnesota lub Tsiab Peb Caug mam li ntxiv qhov $1,000.00 ntawd rov qab rau nws.

Txawm hais tias cov sij hawm los mus npaj lub Tsiab Peb Caug xyoo no yuav luv heev los, ib tsoom Hmoob tseem tuaj koom nchuav nthwv li qub. Teeb meem los kuj tsis muaj tshwm sim hlo li. Cov koom hauv Hmoob nyob rau hauv 2 lub nroog ntxaib no los kuj tuaj pab txawb raws nraim yawg hlob Tsav Yias lub siab xav. Vim yog li no, lub Tsiab Peb Caug no thiaj khiav tau mus zoo heev. Yawg hlob Tsav Yias tau hais qhia rau Hmoob Pages hais tias, “Hauv 3 hnub, yog muaj txog thaj tsav 45,000 tus neeg tuaj mus koom nrog rau lub Tsiab Peb Caug no.” Yog li no, Yawg hlob Tsav Yias thov ua tsaug rau ib tsoom niam txiv kwv tij Hmoob uas tau koom thiab pab txhawb rau lub Tsiab Peb Caug xyoo 2011-12 no. Nws thov Kom ib tsoom Hmoob tsuas muaj ntsib kev noj qab nyob zoo rau lub xyoo tshiab no.

Tus sau: Chalee Yang