Plaub Ntug Tua Neeg Raug Kaw Nkuaj
Raws li tsab ntawv xov xwm Star Tribute tshaj tawm nyob rau hauv lub 11, hnub tim 22, 2011 no, Keej Thoj, 21 xyoos thiab nyob rau lub zos Maplewood, tau lees nws lub txim txaum uas nws tau muaj feem cuam nyob rau hauv sab kev nyiag Ntxuam Lauj lub tsheb coj los dawj yuav tej khoom, thiab cuam tshuam mus rau sab kev txo Ntxuam Lauj txoj sia nyob rau lub 9 hli hnub tim 9, 2010 uas tau dhau los lawm no.
Raws li tsab ntawv xov xwm Star Tribute thiab Pioneer Press tau hais mas, tsaib no hauv lub 9 hli hnub tim 9, 2010, Ntaub Xyooj, uas yog Keej tus phooj ywg, tau pom Ntxuam Lauj lub tsheb, ces nws txawm nyiam heev. Ntuab thiaj tau hais kom Ntxuam tuaj coj Ntaub mus sim khiav Ntxuam lub tshej. Nkawv txawm mus nres rau ntawm txoj kev 55th Street North hauv lub nroog Lake Elmo, ces nkawv txawm tawm hauv lub tsheb mus rau tom ib lub vos hav. Kwv yees hais tias thaum lub sij hawm no yog lub sij hawm Ntaub tua Ntxuam ib phom rau ntawm plab thiab cia kom Ntxuam tuag rau tom vos hav. Ntaub thiaj rov los caij Ntxuam lub tsheb los tsev lawm. Muaj hmoo, muaj neeg los pom Ntxuam nyob rau ntawm thaj tsav txoj kev De Montreville Trail North, thiab thiaj hu tsheb thauj neej mob tuaj thauj Ntxuam los rau ntawm lub tsev kho mob Regions Hospital. Tiam sis ho tsis muaj hmoo, Ntxuam tau los tuag rau hauv lub tsev kho mob Regions Hospital no lawm.
Lub 9 hli ntuj hnub tim 10, 2010 cov tub ceev xwm thiaj mus nrhiav tau Ntxuam lub tsheb nyob rau hauv lub Sunfish Lake Park, nroog Lake Elmo. Thaum nrhiav tau lawm, thiaj pom tau hais tias cov khoom tsheb nyob tsis txhij hlo li. Cov tub ceev xwm thiaj rov qab mus taug xyuas nkawv cov kev sib hu xov tooj. Hauv lub 9 hli hnub tim 10, cov tub ceev xwm thiaj tau mus txom Ntaub nyob rau tom Ntaub tsev. Thaum txom tau Ntaub lawm, cov tus ceev xwm thiaj ho mus txom tau Keej.
Yeej muaj tseeb hais tias thaum lub sij hawm Ntaub tua Ntxuam no Keej yeej tsis nyob rau ntawd tiag. Tiam sis Keej yeej paub ua ntej lawm hais tias Ntaub yuav mus nyiag Ntxhuav lub tsheb no. Thiab, yog nyiag tau los txog, Keej yeej yuav pab Ntaub hle cov khoom tsheb no coj mus ua lwm yam.
Huav lub 11 hlis hnub tim 21, 2011, tus kws txiav txim plaub ntug Richard Ilkka tau txiav txiv kaw Keej Thoj 4 xyoo nyob rau hauv lub tsev kaw neeg St. Cloud Prison. Nrog qhov 4 xyoos no, tus kws txiav txim plaub ntug Ilkka yuav suav 437 hnub uas Keej twb tau nrog kaw los lawm. Yog li no, Keej yuav tsuas raug mus nyob nkuaj tham tsam 3 lub xyoos ntxiv lawm xwb. Dua li, tus kws txiav txim plaub ntug Ilkka tseem tau yuam kom Keej them nqi taub tau rau Ntxuam tus poj niam, uas yog $19,557, thiab $6,500 rau pab neeg tswj fwm nyob hauv sab Minnesota Crime Victims Reparations Board. Hos rau Ntaub Xyooj, uas yog tus nyiag lub tsheb thiab tau tua Ntxuam Lauj tuag kiag lawm, lawv twb hais nws rooj plaub tiav tag lawm, thiab nws twb tau txias nws lub txim txaum tag lawm. Ntaub Xyooj lub txim tua neeg zaum no yog nws yuav tau mus nyob nkuaj mus tas nws ib sim neej
Ntawm no yog Ntaub Xyooj thiab Keej Thoj nkawv ob tug phooj ywg rooj plaub tub sab thiab tua neeg uas tau muaj tshwm sim nyob rau hauv tsaib no, xyoo 2010.
Tus sau: Chalee Yang
