Xaiv Looj Yaj Raug Nrho Tawm Hauv Lub Koos Haum Tsev Neeg Los Tsuas

Dr. Xaiv Looj Yaj uas yog Tus Thawj Coj (Director) ntawm lub koos haum Tsev Neeg Los Tsuas nyob rau lub xeev Minixautas los sis Lao Family Community of Minnesota (FLC), tau raug nrho tawm nyob rau hauv lub 10 hli ntuj hnub tim 10, 2011 no. Vim tsis muaj ib tug twg paub meej, Hmong Pages thiaj tau mus nug hauv paus ti hauv ntsis kom saib puas tau ib qho puav pheej los pub rau peb Hmoob. Yog li no, Hmoob Pages thiaj tau mus mloog Director Xaiv Looj tham, nrog yawg hlob Tswj Pheej Lis, thiab nrog yawg hlob Tub Xyooj nkawv tham. Thiaj pom tias qhov kev sib cov nyom no yog twb tau muaj tshwm sim ua ntu zus los mus puag thaum lub 12 hlis ntuj, 2010, los txog ntua lub vij ceeb tam sim no.

Thaum yawg hlob Nkaj Huas Yaj, Tus Tuam Thawj, yawg hlob Tswj Pheej Lis, Tus Lwm Thawj, thiab yawg hlob Tub Xyooj, Tus Tuav Ntaub Ntawv, ntxiv rau lawv 8 leej ntxiv, yog Cov Thawj Tswj Fwm (Board of Directors) rau lub koos haum LFC, tau los mus tuav tswv yim, thiab hloov cov kev cai lij choj (Bylaw) uas yog ib txwm muaj los mus tswj fwm lub koos haum LFC. Ib tsab cai uas raug hloov nyob hauv xyoo 2008, yog hloov kom txhua leej txhua tus laj mej pej xeem Hmoob tuaj mus xaiv tsa tau. Raws li yawg hlob Tub Xyooj piav mas, “Lub koom haum LFC no yog ib koom hauv pab laj mej pej xeem nrog rau nws ib co tswv cuab.” Nqe lus no txhais tau hais tias txawm LFC yuav muaj tus Director, uas yog tau nyiaj hnub nyiaj hli, los sis cov Board of Directors, uas yog ib pawg neeg raug xaiv tsa los mus tswj fwm lub koos haum yam tias tsis tau ib npib ib xus hlo li, los tseem tshuav cov tswv cuab, uas yog ib pawg neeg, uas tau them nyiaj ua ntu zus tuaj mus rau lub koom haum, thiab, ua ntej LFC tsab kev cai lij choj hauv 2008 tshwm sim, lawv thiaj yog cov muaj cai los mus xaiv tsa no nkaus xwb.

Hauv lub 10 hli hnub tim 13 no, Hmong Pages thiaj tau mus mloog Director Xaiv Looj tham, thaum tom qab nws tau raug nrho tawm ntawm nws txoj hauj lwm, tiam sis nws kuj hais tsis tau ib lo lus tseem ceeb. Nws hais tawm hais tias, “Kuv mas tsuas muaj kev chiv xwb, tsis muaj kev tu siab hlo li.” Nws hais tau lo lus no yog yeeb vim nws muaj txoj kev hlub rau lub koom haum LFC heev. Nws tau ua txhua tsav txhua yam, txawm hais tias nws yuav tau nrho nws nyiaj hauv nws hnab ris los mus siv los, nws yeej tsis khuv xim hlo li. Tsis tas li no xwb, nws kuj tsis pom hais tias nws tau ua dab tsis txaum rau yawg hlob Tswj Pheej los sis yawg hlob Tub Xyooj nkawd ob pab hlo li. Yog li no, Hmong Pages thiaj tau nrhiav tham nrog yawg hlob Tswj Pheej thiab yawg hlob Tub Xyooj nkawv hais txog qhov xwm txeej no.

Hauv lub lim piam dhau los no, Hmong Pages thiaj tau tham nrog yawg hlob Tub Xyooj thiab yawg hlob Tswj Pheej nkawv. Kev sib tham zaum no kuj tau muaj ntau tsav ntau yam lus tshwm sim raws li nram no.

Hauv lub 2 hlis ntuj, 2011, yawg hlob Tswv Pheej Lis, yawg hlob Nyiaj Tsheej Vaj, yawg hlob Soob Tub Xyooj, thiab yawg hlob Tub Xyooj lawv kuj tau raug caw tuaj koom ib lub rooj sib tham thiab yuav muab cov npav, uas tej laj mej pej xeem tau tuaj pov nyob rau hauv lub 12 hlis hnub tim 11, 2010, coj los qhib kom paub meej hais tias leej twg yog tus yeej, thiab leej twg ho yog tus swb. Hauv lub sij hawm no, yawg hlob Tub Xyooj kuj yog thawj thawj tug uas tsis pom zoo cia qib lub thawv ceev cov npav no. Kev nws tsis pom zoo zaum no yog vim hais tias cov kws teev tsa lub rooj sab laj no tau muab caij nyoog tsis raws kev raws cai, sai dhau heev lawm. Hos ntawm yawg hlob Tswv Pheej mas, nws yeej zoo siab hlo, thiab nws yeej tsis xav li yawg hlob Tub Xyooj, cov thawj coj, thiab nrog rau coob leej ntau tus cov tswv cuab.

Hauv lub 4 hlis yuav luag tag, lub tuam tsev hais plaub nyob rau hauv Ramsey County thiaj li tsis kam lees paub txog yawg hlob Tub Xyooj lawv pab board uas tau raug xaiv tsa los ntawm LFC cov tswv cuab nyob rau hauv lub 4 hlis ntuj hnub tim 23, 2011. Raws li yawg hlob Tswj Pheej xav mas, Director Xaiv Looj tau muaj feem cuam nyob rau hauv txoj hau kev no thiab. Txuas mus ntxiv, nyob rau hauv lub 5 hlis ntuj hnub tim 1, 2011, nrog kev tso cai los ntawm tus kws tu plaub ntug Otsby, cov kws tswj fwm lub thawv pov npav hauv lub 12 hlis no, uas yog neeg Amelikas, thiaj tau rov qab tuaj, ua zaum thib ob, thiaj tuaj qhia rau ib tsoom Hmoob paub hais tias, yawg hlob Tswj Pheej tau yeej lawm. Raws li IAMHmoob TV tau tshaj tawm, kev tau suab pov npav nyob rau hauv lub 12 hlis ntuj yog muaj li ntawm no, yawg hlob Tswj Pheej tau 591 lub suab, yawg hlob Nhiaj Tsheej Vaj tau 293 lub suab, yawg hlob Soob Tub Xyooj tau 240 lub suab, thiab yawg hlob Tub Xyooj tau 66 lub suab. Tom qab ntawd, yawg hlob Tswj Pheej kuj tau sau ib tsab ntawv tuaj rau Director Xaiv Looj, kom nws pab tshaj thiab teem caij nyoog nrog LFC cov tub teg tub taw thiab cov Board tshiab no, kom lawv tau tuaj mus sib ntsib, sib fim, thiab kom thiaj paub ua hauj lwm ua ke. Txawm li no los, Director Xaiv Looj tseem las mees qees. Raws li yawg hlob Tswj Pheej tau hais mas, “Director Xaiv Looj Yaj tseem niaj hnub li dej li num nrog rau yawg hlob Tub Xyooj lawv pab xwb.”

Pib kiag lub 6 hli, 2011, yawg hlob Tswj Pheej lawv pab Board thiaj tau sau ib tsab ntawv tuaj rau Director Xaiv Looj, ceeb toom txog ntawm nws ntiag tug dej num, kom nws lees paub, thiab kos nws lub npe rau ntawm tsab ntawv no. Director Xaiv Looj kuj tau ua raws nraim li yawg hlob Tswj Pheej hais, tiam sis nws ho tau teev ntxiv ib nqe lus ntxiv hais tias, “Kuv tsis pom kuv txoj kev txaum,” nyob rau hauv qab tsab ntawv no. Txawm yuav zoo li no los, yawg hlob Tswj Pheej tseem txaus siab yuav ua hauj lwm nrog Director Xaiv Looj ua ke, vim lub Xya hli ntuj hnub tim 4 (July 4) los twb yuav txog lawm tiag. Yawg hlob Tswj Pheej thiaj tau rov qab sau ib tsab ntawv tuaj rau Director Xaiv Looj, taug qab txog lub July 4 cov ntaub ntawv muag cov rooj ua lag ua luam, kom lawv pab Board tshiab no thiaj li paub los mus pib lij dej li num. Tom qab ntawd, Director Xaiv Looj thiaj tau caw yawg hlob Tswj Pheej lawv, nrog rau cov tub lag tub luam, thiab Tub Xyooj lawv tuaj puv tsev, sib tham hais txog lub July 4 no. Thaum lub sij hawm no, tej lus nkib lus nkaus thiaj tau muaj tshwm sim, tub ceev xwm thiaj tau tuaj, thiab yawg hlob Tswj Pheej thiaj tau raug coj tawm ntawm lub rooj sab laj no lawm. Tsis tas li no xwb, Director Xaiv Looj lawv tseem ua ib daig ntawv txwv txiav (restrain order) tsis pub yawg hlob Tswj Pheej tuaj ze LFC thiab Director Xaiv Looj lub tsev kom txog ntua lub 10 hli ntuj hnub tim 21, 2011 no.

Thaum zoo li no lawm, yawg hlob Tswj Pheej thiaj tau rov qab mus thov kev pab hauv tsev hais paub nyob rau hauv Ramsey County dua, ua zaum thib ob, nyob hauv lub 6 hli ntuj hnub tim 24, 2011. Yawg hlob Tub Xyooj thiab Director Xaiv Looj nkawv thiaj raug mus ntsib kws tu plaub ntug Lindman nrog rau yawg hlob Tswj Pheej. Kws tu plaub ntug Lindman thiaj tau phua lub txim hais tias, yeeb vim ze lub July 4 heev dhau lawm ces, yuav muab rooj plaub no ncua mus rau lub 8 hli. Tiam sis, ntawm lub July 4 ces yuav tso cai rau Director Xaiv Looj los mus ua tus tswj thiab khiav, thiab tsis pub ob tog, yawg hlob Tswj Pheej thiab yawg hlob Tub Xyooj nkawd, los nrog tswj hlo li. Raws li yawg hlob Tub Xyooj hais mas, “Tuaj mus pab dag pab zog tau, tiam sis tsis pub tshaj qhov no li.” Yog li no, yawg hlob Tub Xyooj lawv thiaj li tau tuaj pab dag pab zog rau lub July 4 tib yam li ib tug tswv cuab nkaus xwb. Thiab yeej tsis khuv xim lawv tej dag zog hlo li, tsuav kom Hmoob Minixautas tsis txhob pub poob ntsej muag nkaus xwb.

Hauv lub 10 hli hnub tim 6, 2011, kws tu plaub ntug Lindman thiaj tau txiav txim cia yawg hlob Tswj Pheej pab ua pab yeej. Lawv thiaj los pib tuav lawv teg dej num nyob hauv lub 10 hli hnub tim 7, ces lub 10 hli hnub tim 10, lawm thiaj tau muab Director Xaiv Looj nrho tawm. Qhov yawg hlob Tub Xyooj nyhav siab tshaj mas yog qhov hais tias, lawv coj 2 tug tub ceev xwm tuaj thiab tsuas muab 10 feeb rau Director Xaiv Looj sau nws ntiag tug khoom tawm ntawm lub LFC xwb. Hos raws li yawg hlob Tswv Pheej hais mas, “Yeeb vim nws muaj ib co khoom tawv, xws tej ntaj nyob rau hauv nws lub hoob kas, thiab tsis xav kom muaj teeb meem tshwm sim nyob rau hauv LFC.” Raws li Hmong pages tau txais cov ntaub ntawv mas, yawg hlob Tswv Pheej lawv kam sau muaj 4 daig ntawv ceeb toom rau Director Xiav Looj hais txog txoj kev tsis pub nws ua dhau tshaj nws ntiag tug dej num.

Hais txog ntawm yawg hlob Tswj Pheej thiab yawg hlob Tub Xyooj nkawv ob tog tej nuj nqi ntiav kws lij choj nyob rau hauv txoj kev sib foob zaum no. Rau yawg hlob Tswj Pheej tog nuj nqi ces, lub koos haum LFC raug ua tus them tag nrho vim hais tias nws tau yeej rooj plaub no lawm. Rau yawg hlob Tub Xyooj sab nuj nqi ces, vim nws yog tus xwb, ces nws cov nuj nqi ces nws ris tag nrho, uas yog raug thaj tsam $30 phav. Nws tseem tau hais ntxiv hais tias, muaj ib feem nqi yog cuam tshuam los ntawm sab kev ua cov ntaub ntawv txwv txiav tsis pub yawg hlob Tswj Pheej tuaj ze rau lub LFC, uas muaj Director Xaiv Looj lub npe tau tshwm sim nyob rau hauv cov ntaub ntawv no thiab.

Xaus no, nyob rau hauv lub 10 hli hnub tim 13, 2011, yawg hlob Tub Xyooj lawv pab board kuj tau hu ib lub rooj sab laj thiab tshaj tawm rau cov tswv cuab paub hais tias, lawv yuav thov laj tawm thiab tso lawv teg dej num tseg li no lawm xwb. Rau Director Xaiv Looj Yaj, vim Hmong Pages hu tsis tau nws hlo li, yog li ntawd, kuj tsis muaj leej twg paub meej hais tias nws yuav taug txoj hau kev twg tiag. Hos rau yawg hlob Tswj Pheej lawv pab board ces, lawv kuj tau los mus tuav lawv teg dej num nyob rau hauv lub koos haum LFC raws nraim li lawv lub hom phiaj lawm.

Tus sau: Chalee Yang